சிக்குபுக்கு - விமர்சனம்!

நடிப்பு: ஆர்யா, ஸ்ரேயா, சந்தானம், ப்ரீத்திகா ராவ்
ஒளிப்பதிவு: கேபி குருதேவ்
இசை: கலோனியல் கஸின்ஸ்
இயக்கம்: மணிகண்டன்
தயாரிப்பு: மீடியா ஒன் குளோபல்
பிஆர்ஓ: செல்வரகு

மறைந்த இயக்குநர் ஜீவாவின் சிஷ்யர் இயக்கியருக்கும் முதல்படம். நிறைய காட்சிகளில் ஜீவாவின் பாதிப்பு தெரிந்தாலும், ஒரு நல்ல பொழுதுபோக்கைத் தரும் நோக்கம் தெரிகிறது. ஆனால் நினைத்ததை முழுமையாக செயல்படுத்த முடியாமல் தடுமாறியிருக்கிறார் பல இடங்களில்.

லண்டனில் வசிக்கும் ஆர்யா, தன் பூர்வீக வீடு கடன்காரர்களின் பிடியில் மூழ்கிப் போகாமல் தடுப்பதற்காக காரைக்குடிக்கு பயணமாகிறார். அதே லண்டனில் வசிக்கும் எம்பிஏ பட்டதாரியான ஸ்ரேயா உடம்பு சரியில்லாத அப்பாவைப் பார்க்க மதுரைக்கு கிளம்புகிறார். இருவரும் ஒரே ப்ளைட்டில் பெங்களூர் வருகிறார்கள்.

பெங்களூரிலிருந்து மதுரைக்கு செல்லும் விமானம் ஸ்ட்ரைக் காரணமாக ரத்தாகிவிட, யதேச்சையாய் ஒரு ரயில் டிக்கெட் கிடைக்கிறது. வேறு ஒரு தம்பதியின் டிக்கெட். அவர்களின் பெயரில் இவர்கள் பொய்யாக கணவன் மனைவி போல பயணிக்கிறார்கள். ஆனால் அந்தப் பொய்யைக் கண்டுபிடித்து விடுகிறார் டிடிஆர். பாதிவழியில் இறக்கிவிட, கிடைக்கிற வாகனங்களில் காதலும் சிணுங்கலுமாக பயணிக்கிறார்கள். இறுதியில் எப்படி சேர்ந்தார்கள் என்பது க்ளைமாக்ஸ்.

இடையில் ஆர்யாவின் தந்தையின் (அவரும் ஆர்யாதான்... டபுள் ரோல்) காதல் ப்ளாஷ்பேக் விரிகிறது. நண்பனுக்காக காதலை விட்டுக் கொடுக்கிற அவரது கதை, மகன் ஆர்யா - ஸ்ரேயா காதலுடனே பயணிப்பது கொஞ்சம் புதுசு.

ஆர்யா தன் திறமையைக் காட்ட நல்ல வாய்ப்பு ஏற்படுத்தித் தந்துள்ளார் இயக்குநர். ஆனால் அவரோ சில காட்சிகளில் ஈடுபாடே இல்லாமல் வந்து போவதைப் போன்ற உணர்வு நமக்கு.

அந்தக் கால அப்பா ஆர்யா, இன்றைய மகன் ஆர்யா... இரண்டு கெட்டப்புகளையுமே கவனமெடுத்து உருவாக்கியிருக்கிறார்கள். இவற்றில் மகன் கேரக்டரில் ஆர்யா வழக்கம்போல வருகிறார். அப்பா வேடத்தில் பரவாயில்லை.

அவருக்கு இரண்டு நாயகிகள். இந்தக் கால ஆர்யாவுக்கு ஸ்ரேயா ஜோடி. கொஞ்சம் ஓவர் ஆக்டிங். ஆனால் க்ளாமர் என்ற பெயரில் அவர் செய்வதில் கிளுகிளு உணர்வுக்கு பதில் பரிதாபமே மிஞ்சுகிறது. உடம்பைப் பாத்துக்கங்க அம்மணி!

ஆனால் அவரை விட அழகில் ஈர்க்கிறார் மீனாள் என்ற கேரக்டரில் அறிமுகமாகியுள்ள ப்ரீத்திகா. அப்பா ஆர்யா - ப்ரீத்திகா காதல் காட்சிகளில் இளமை குறும்பு கொப்பளிக்கிறது. ஆனால் நடிப்பில் இன்னும் பயிற்சி வேண்டும் ப்ரீத்திகாவுக்கு.

சந்தானம், ஜெகனின் காமெடி படத்துக்கு ரொம்பவே கைகொடுத்துள்ளது. அப்பா ஆர்யாவின் நண்பராக வரும் அனுப்குமார் பாத்திரமும், அவரது நடிப்பும் மகா எரிச்சல். அப்பா ஆர்யாவின் காதலுக்கு ஏற்படும் முடிவும் படு செயற்கை.

ஆர்யா - ஸ்ரேயா ஜோடி ஓகே என்றாலும், இந்த இருவருக்குமான பயணம், 'தில்வாலே துல்ஹனியா லே ஜாயேங்கே' மாதிரி ச்சும்மா இளமையும் குறும்பும் நகைச்சுவையுமாக மிளர வேண்டாமா... காட்சிகள் தேமே என்று நகர்கின்றன. சில இடங்களில் பிடித்துத் தள்ள வேண்டிய அளவுக்கு ஸ்லோ.

தொழில்நுட்ப கலைஞர்களில் குருதேவின் ஒளிப்பதி ரம்மியமாக உள்ளது. படத்தின் பெரிய மைனஸ் கலோனியல் கஸின்ஸின் இசை. பாடல்கள் - பின்னணி இசை இரண்டிலுமே தம் போதவில்லை!

ஆர்யா - ஸ்ரேயா பயணக் காட்சிகளில் எடிட்டர் இன்னும் கத்தி வைத்திருக்கலாம்.

மணிகண்டனுக்கு இது முதல் படம் என்ற வகையில், சில மைனஸ்களை மன்னிக்கும் மனமிருந்தால், படத்தை பொறுத்துக் கொள்ள முடியும்!

கோபத்தைக் குறைக்க 1 ஸ்பூன் சர்க்கரை போதும்: அமெரிக்க ஆய்வு!

டெல்லி: அடுத்த தடவை நீங்கள் கோப்பபடும்போது சட்டென்று இனிப்பான ஒரு கிளாஸ் எலுமிச்சம் பழச்சாறு அல்லது ஒரு சாக்கலேட்டை சாப்பிடுங்கள். அவ்வாறு செய்தால் உங்கள் கோபம் சிறிது நேரத்திற்கு தணியும்.

கோபம் வரும்போது ஒரு ஸ்பூன் சர்க்கரையை எடுத்து வாயில் போட்டால் சிறிது நேரம் கோபம் தணியும் என்று அமெரிக்க ஆராய்ச்சியாளர்கள் கண்டுபிடித்துள்ளனர்.

இந்த ஆராய்ச்சியில் ஒரு சிலருக்கு இனிப்பான எலுமிச்சம் பழச்சாறும், ஒரு சிலருக்கு இனிப்பில்லாததும் கொடுக்கப்பட்டது. இதில் இனிப்பான பழச்சாறு குடித்தவர்கள் புதிதாக பார்ப்பவர்களிடம் சிறிது நேரத்திற்கு பிறகே கோபப்பட்டுள்ளனர். ஆனால் இனிப்பில்லாத பழச்சாற்றை குடித்தவர்கள் எடுத்த எடுப்பிலேயே சீறியுள்ளனர்.

மூளைக்கு சக்தி அளிக்கும் ரத்தத்தில் உள்ள குளுக்கோஸ் தான் இதற்கு காரணம் என்று ஆராய்ச்சியாளர்கள் நம்புகின்றனர்.

இது குறித்து ஒஹாயோ மாநில பல்கலைக்கழகத்தின் தொடர்பு மற்றும் மனோதத்துவ பேராசிரியர் பிராட் புஷ்மேன் கூறியதாவது,

கோபத்தைக் கட்டுப்படுத்த சுய கட்டுப்பாடு தேவை. சுய கட்டுப்பாட்டிற்கு அதிக சக்தி தேவை. குளுக்கோஸ் அந்த சக்தியை மூளைக்கு அளிக்கிறது. இனிப்பான எலுமிச்சம் பழச்சாற்றை குடிப்பது சிறிது நேரத்திற்கு சக்தி அளித்து பிறரிடம் கோபப்படாமல் இருக்க உதவுகிறது என்று அவர் கூறினார்.

இந்த ஆய்வு ஆன்லைனில் அக்ரஸிவ் பிஹேவியர் என்னும் தலைப்பில் இருக்கிறது. இது விரைவில் புத்தகமாக வெளியிடப்படும்.

எஸ்டிடியை நிறுத்தும் பிஎஸ்என்எல்…இந்தியா முழுக்க இனி லோக்கல்தான்!

தரைவழி தொலைபேசி மற்றும் செல்போன்களில் இனி எஸ்டிடி கட்டண முறையே (Subscriber Trunk Dialling – STD) இல்லாமல் செய்யப் போகிறது பொதுத்துறை நிறுவனமான பிஎஸ்என்எல்.

இந்தியாவுக்குள் பல்வேறு மாநிலங்களுக்கு இடையிலான அனைத்து அழைப்புகளையும் இனி லோக்கல் கட்டணத்தில் இன்டர் ஸடேட் அழைப்புகளாக மாற்றப் போவதாக பிஎஸ்என்எல் அறிவித்துள்ளது.

முதல் கட்டமாக இன்று (டிசம்பர் 1) அனைத்து வில் போன்களிலிருந்தும் (WLL) 1 ரூபாய் கட்டணத்தில் மூன்று நிமிடங்கள் பேசிக் கொள்ளும் வசதி அறிமுகமாவதாக பிஎஸ்என்எல் தலைமைப் பொது மேலாளர் (பெங்கால்) சவும்யா ராய் அறிவித்துள்ளார். எஸ்டிடி கோட் எல்லாம் அதேதான். ஆனால் எஸ்டிடி கட்டணம் கிடையாது. 1 ரூபாய்க்கு டெல்லிக்கும் பேசலாம்… அதைத் தாண்டியும் பேசிக்கொள்ளலாம்.

அதே நேரம் லேண்ட்லைனிலிருந்து செல்போனுக்கு அழைத்தால் 1 நிமிடத்துக்கு ரூ 1 கட்டணம் என்பது குறிப்பிடத்தக்கது.

அதேபோல, இதுவரை லேண்ட்லைன் இணைப்பு பெறுவோர், எஸ்டிடிக்கென்று தனியாக எழுதிக் கொடுக்க வேண்டும். இனி அதற்கான அவசியம் இல்லை. இனி அனைத்து லேண்ட்லைன்களுக்கும், இந்தியாவுக்குள் எங்கு வேண்டுமானாலும் தொடர்பு கொள்ளும் வசதி ஏற்படுத்தித் தரப்படும்.

பிஎஸ்என்எல் இந்த அதிரடி முடிவுக்கு வர முக்கியக் காரணம், தரைவழி இணைப்பில் கணிசமான வீழ்ச்சி ஏற்பட்டிருப்பதுதான். தமிழ்நாடு தொலைத் தொடர்பு வட்டத்தில் மட்டும் ஒரே ஆண்டில் 35000 இணைப்புகளை துண்டித்துக் கொண்டுள்ளனர் வாடிக்கையாளர்கள். பெங்கால் வட்டத்தில் இது 40000!

இந்த புதிய அறிவிப்பு மூலம் லேண்ட்லைன் துண்டிக்கப்படுவது பெருமளவு குறையும் என எதிர்ப்பார்க்கப்படுகிறது.

பிஎஸ்என்எல்லின் இந்த முடிவு மற்ற தனியார் துறை தொலைபேசி நிறுவனங்களுக்கு பெரும் அதிர்ச்சியாக அமைந்துள்ளது. பல தனியார் தொலைபேசி நிறுவனங்கள் பெரும் லாபம் ஈட்டுவதே எஸ்டிடி கட்டணத்தின் அடிப்படையில்தான். தற்போது அவை கட்டாயமாக இந்தக் கட்டணத்தைக் குறைத்தாக வேண்டிய நிர்ப்பந்தத்தை பிஎஸ்என்எல் ஏற்படுத்தியுள்ளது.

ஐடிபிஐ வங்கியில் 700 பணியிடங்கள்!

சென்னை: முதல்நிலை வங்கிகளுள் ஒன்றான ஐடிபிஐ வங்கியில் அலுவலர் (எக்ஸிக்யூடிவ்) நிலைப் பணிகளுக்கு விண்ணப்பங்கள் வரவேற்கப்படுகின்றன.

தேர்வு செய்யப்படுவோர் முதலில் 3 ஆண்டு ஒப்பந்தத்தில் பணியில் அமர்த்தப்படுவார்கள். ஒவ்வொரு ஆண்டும் அவருக்கு செயல்பாடு மதிப்பிடப்பட்டு பணி நீட்டிப்பு வழங்கப்படும். மூன்றாம் ஆண்டு முடிவில் தேர்வு மூலமாக அவர் பணி நிரந்தரம் செய்யப்படுவார்.

மொத்த பணியிடங்கள்: 700 (பொது: 332, எஸ்சி: 105, எஸ்டி: 53, ஓபிசி:189)

கல்வித் தகுதி: ஏதாவது ஒரு பாடப்பிரிவில் 55% மதிப்பெண்களுடன் தேர்ச்சி (எஸ்சி, எஸ்டிகளுக்கு 50%)

வயது: 25-க்குள். எஸ்சிஎஸ்டி பிரிவினருக்கு 5 ஆண்டுகளும், ஓபிசியினருக்கு 3 ஆண்டுகளும் வயது வரம்பில் சலுகை உண்டு.

விண்ணப்பக் கட்டணம்: ரூ.400. எஸ்சி, எஸ்டி, முன்னாள் ராணுவத்தினருக்கு ரூ.75. கட்டணத்தை ஐடிபிஐ, எஸ்பிஐ வங்கிக் கிளைகளில் அதற்கான சலானில் 15.12.2010-க்குள் செலுத்த வேண்டும்.

விண்ணப்பிக்கும் முறை: www.idbi.com அல்லது www.idbibank.com ஆகிய இணையதளங்கள் மூலம் 15.12.2010 வரை ஆன்லைனில் விண்ணப்பிக்கலாம்.

கூடுதல் விவரங்களுக்கு: www.idbi.com அல்லது www.idbibank.com

விரிவான விளம்பரம் காண

குறிப்பு: ஆன்லைனில் பூர்த்தி செய்த விண்ணப்பத்தை உரிய இடத்தில் புகைப்படத்தை ஒட்டி எழுத்துத் தேர்வுக்கு எடுத்து வர வேண்டும்.

நந்தலாலா – விமர்சனம்!

நடிப்பு: மிஷ்கின், ஸ்னிக்தா, அஸ்வத் ராம்

இசை: இளையராஜா

ஒளிப்பதிவு: மகேஷ் முத்துசாமி

தயாரிப்பு: அய்ங்கரன்

இயக்கம்: மிஷ்கின்

எது நல்ல படம்…? இதோ அறிவு ஜீவிகளின் இலக்கணம்:

அந்தப் படம் சில மனநிலை பாதித்தவர்களை மையப்படுத்தி எடுக்கப்பட வேண்டும். பார்த்த மாத்திரத்தில் பளிச்சென்று வெகுஜனப் பார்வையாளனுக்கு புரியக் கூடாது. முக்கியமாக மெதுவாக நகர வேண்டும். ஒரு காட்சி, முடிந்தளவு… அதன் இறுதிப் பகுதி வரை நீ…ளமாக எடுக்கப்பட்டிருக்க வேண்டும்..!

கட்டாயம் செக்ஸ் தொழிலாளி ஒருவர் இடம்பெற்றிருக்க வேண்டும்!

-இந்த இலக்கணத்தை மீறாமல் வந்திருக்கிறது மிஷ்கின் இயக்கியுள்ள ‘மாற்று சினிமா’வான நந்தலாலா. ஆனால் நந்தலாலாவை இவை மட்டுமே ஆக்கிரமிக்கவில்லை… இவற்றையும் தாண்டிய ஒரு வித்தியாசமான அனுபவம் கிடைப்பதையும் குறிப்பிட்டே ஆக வேண்டும்.

ஒரு விடுமுறை நாளில் கைவசமிருக்கும் பழைய புகைப்படத்தையும் முகவரியையும் (உடன் மேப்பையும்) வைத்துக் கொண்டு தன் தாயைத் தேடி கிளம்புகிறான் சிறுவன் அகி. வழியில் பாஸ்கரமணியைச் சந்திக்கிறான் (மிஷ்கின்). பாஸ்கரமணி மனநிலை பாதிக்கப்பட்டவன். ‘சின்னத்தம்பி’யை விட கொஞ்சம் முற்றிய நிலை… ஆனால் நல்ல மனசு…!

இருவரும் ஒருவருக்கொருவர் துணையாக உணர்கிறார்கள். பயணம் தொடர்கிறது. வழியில் பல சுவாரஸ்யமான மனிதர்களைச் சந்திக்கிறார்கள். ஒரு செக்ஸ் தொழிலாளி (ஸ்னிக்தா) உடன் சேர்ந்து கொள்கிறாள்.

ஒருவழியாக சிறுவனின் தாய் இருக்கும் கிராமத்துக்குப் போய் ஆளுக்கொரு பக்கம் வீட்டைத் தேடுகிறார்கள். ஒரு வீட்டில் அந்தப் பெண்ணைப் பார்த்து விடுகிறான் பாஸ்கரமணி. அவளோ ஒரு புதிய குழந்தை, புதிய கணவன் என புதிய வாழ்க்கையில் செட்டிலாகிவிட்டிருக்கிறாள். பாஸ்கரமணி தான் வந்த விஷயத்தை சொன்னதும், அவன் காலில் விழுந்து கதறும் அந்தப் பெண், எக்காரணத்தைக் கொண்டும் தான் இருக்கும் இடத்தை சிறுவனுக்கு சொல்ல வேண்டாம் என்றும், அதற்காக எவ்வளவு பணம் நகையும் தரத் தயாராக இருப்பதாகவும் கெஞ்சுகிறாள்.

அங்கிருந்து அமைதியாக வெளியேறும் பாஸ்கரமணி, சிறுவனின் தாய் அங்கே இல்லை என்று கூறிவிட்டு, தனது சொந்த ஊருக்கு சிறுவனை கூட்டிப் போகிறான். அங்கே மனநிலை பாதிக்கப்பட்ட தனது தாயைப் பார்க்கிறான். அவளை ஒரு ஹோமில் சேர்க்கிறான்.

பின்னர் சிறுவனும், பாஸ்கரமணியும், அந்த முன்னாள் செக்ஸ் தொழிலாளியும் பயணத்தைத் தொடர்கிறார்கள். அப்போது வழியில் தன் தாய் இன்னொரு குழந்தை, கணவனுடன் காரில் பயணிப்பதைப் பார்த்துவிடுகிறான் சிறுவன். தன் தாய் இனி வரமாட்டாள் என்ற உண்மை புரிகிறது.

அடுத்து சிறுவனும் பாஸ்கரமணியும் தன் பயணத்தை தொடர்கிறார்களா… முடித்துக் கொண்டார்களா என்பது க்ளைமாக்ஸ்.

இந்தக் கதை ‘இன்ன படத்தின் பாதிப்பில் எடுக்கப்பட்டது’ என்று தைரியமாக சொல்லிவிட்டே, செய்திருக்கலாம் மிஷ்கின். யாரும் இதற்காக அவரிடம் சண்டைக்கு நின்றிருக்கப் போவதில்லை.

தழுவல் கதையாக இருந்தாலும் அதை அபாரமாகக் காட்சிப்படுத்தியிருக்கிறார். ஆனால் அநியாயத்துக்கு ஆமை வேகம். ஒரு காட்சியின் அழகை முழுதாக உணரும் முன்னே அடுத்த காட்சிக்கு வேகம் பிடிப்பதுதான் ரசிகனின் ஆவலை படம் முழுக்கக் காப்பாற்றும் உத்தி. அது இந்தப் படத்தில் இல்லை. இளையராஜா மட்டும் இல்லாமல் போயிருந்தால்… கஷ்டம்தான்!

அந்த இளநீர்க்காரர், விவசாயி, லாரி டிரைவர், ஜப்பானிய ஸ்டைல் பைக் ஓட்டிகள், ஐஸ் வண்டிக்காரர்… குறிப்பாக சைக்கிளிலிருந்து விழுந்து, அடிபட்டு மிஷ்கினால் உதவப்படும் மாணவி, வீட்டுக்குப் போய் ட்ராக்டருடன் வரும் கவிதைக் காட்சி…

-ஒரு நெடிய களைப்பான பயணத்தில் சின்னச் சின்னதாய் எட்டிப் பார்க்கும் சுவாரஸ்ய கவிதைகள்!

மைனஸ் என்று பார்த்தால்… நிறைய்ய்ய்ய!

மனநிலை பிறழ்ந்த பாஸ்கரமணிக்கு எல்லாம் நன்றாகத்தான் தெரிகிறது… வேறு புருஷனுடன் வசிக்கும் சிறுவனின் தாயைக் காப்பாற்றும் அளவுக்கு புத்திசாலி. மனநிலை பாதித்த அம்மாவை ஹோமில் சேர்க்கும் அளவு பாசமானவர். ஆனால் இயல்பாகப் பேச மட்டும் தெரியாதா? அட இடுப்பில் நிற்காமல் அடம்பிடிக்கும் பேண்டைக் கூடவா கட்டிக் கொள்ளத் தெரியாது! ஒருவேளை அவர் முன்பே ‘தெளிந்துவிட்டார்’ என்று சொல்ல வந்தால்… படம் முழுக்க மெண்டலாக ‘நடிக்கிறாரா’ ‘தெளிந்த’ பாஸ்கரமணி?

இதை வித்தியாசம் என்றோ… அறிவு ஜீவித்தனம் என்றோ ஏற்க முடியாது. மிகை!

சினிமா ஒரு காட்சி ஊடகம் என்பது உண்மைதான்… அதற்காக பேச வேண்டிய இடங்களில் கூட ஊமையாகத்தான் இருப்பேன் என்று அடம் பிடிக்கின்றன மிஷ்கினின் பாத்திரங்கள்.. ஆனால் அந்த இடம் ராஜாவின் நெகிழ்வான இசைக்கு வழிவிடுவதால் தாராளமாய் மன்னிக்கலாம்!

நடிப்பில் அஞ்சாதேயில் வரும் ‘குருவி’யை நினைவுபடுத்துகிறது மிஷ்கினின் வசன உச்சரிப்புகள். வெளியுலகுக்கு மனநிலை பிறழ்ந்தவராகவும், உள்ளுக்குள் மகா நல்லவராகவும் இருக்கும் பாத்திரம்… அதை உணர்ந்து செய்திருக்கிறார். என்ன இருந்தாலும் ஒரு இயக்குநர்தான் படத்தின் நிஜமான நடிகன் என்பதை உணர வைத்திருக்கிறார். ஏற்ற களம் அமையும்போது நடிப்பைத் தொடரலாம் தைரியமாக.

சிறுவன் அஸ்வத் ராம், இளநீர் வியாபாரம் செய்யும் தாத்தா, ஜப்பானிய ஸ்டைல் பைக்கர்ஸ், செக்ஸ் தொழிலாளியாக வரும் ஸ்னிக்தா… எல்லாருமே கோட்டைத் தாண்டாமல் அடக்கி வாசித்திருப்பது பெரிய ப்ளஸ்.

மகேஷ் முத்துசாமியின் ஒளிப்பதிவு கண்களுக்கு தனி அனுபவத்தைத் தருகிறது. ஆற்றின் போக்குடன் நாணல் நெளியும் அழகை காட்டும் ஒரு ப்ரேம்… அட்சர லட்சம் பெறும். எடிட்டருக்கு எந்த வேலையும் இல்லை போலிருக்கிறது படத்தில்!

அப்புறம்… படத்தின் நிஜ ஹீரோவான இளையராஜா!

பிரமாதப்படுத்தியிருக்கிறார் மனிதர். விருதுகளுக்கு அப்பாற்பட்ட இசை. மிஷ்கின் தனது இயக்கத்தில் விட்டுவைத்துப் போன ஓட்டைகளைக் கூட தன் இசையைக் கொண்டு நிரப்பிவிட்டார் இளையராஜா. மனிதன் தன் முகத்தால் வெளிக்காட்ட முடியாத உணர்வுகளை அற்புதமாய் பேசியிருக்கிறது அவரது இசை.

ராஜாவின் குரலில் ஒலிக்கும், ‘மெல்ல மெல்ல ஊர்ந்து வரும்…’ நெஞ்சைக் கிளர்த்துகிறது. ‘தாலாட்டுக் கேட்க நானும்…’ மனதைப் பிசைகிறது.

ஆனால் ஜேசுதாஸ் பாடியிருக்கும் ‘ஒண்ணுக்கொன்னு துணையிருக்கு உலகத்திலே…’ பாடல், ராஜா ராஜாதான் என நம்மையும் அறியாமல் முணுமுணுக்கச் செய்கிறது.

படத்தின் விளம்பரங்களில் இளையராஜாவின் பெயரை முன்னிலைப்படுத்தி, சரியாகவே மரியாதை செய்துள்ளார் மிஷ்கின்!

நல்ல படம் கெட்ட படம் என்ற வட்டத்தைத் தாண்டி, ‘ஒரு புதிய அனுபவம்’ என்று சொல்ல வைத்திருக்கிறது நந்தலாலா!

34 ஆண்டுகளாக கேட்பாரற்று கிடக்கும் பாலம்!

சென்னை எலியட்ஸ் கடற்கரை அருகே 1976ஆம் ஆண்டு இடிந்து விழுந்த அடையாறு பாலத்தை மீண்டும் கட்டித்தர வேண்டும் என்ற கோரிக்கை எழுந்துள்ளது.

திரைப்படங்களில் மட்டுமே தென்படும் அடையாறு முகத்துவார பாலம் சென்னையில் ஆண்டு கணக்கில் வசிப்பவர்கள் பலரும் அறிந்திடாத ஒன்று.

பட்டிணப்பாக்கத்தில் உள்ள சீனிவாசபுரம், டும்மிங்குப்பம் பகுதிகளையும், பெசன்ட் நகரை ஒட்டியுள்ள எலியட்ஸ் கடற்கரையில் உள்ள ஊரூர் குப்பம், மொழிக்குப்பம் ஆகிய மீனவ பகுதிகளை இணைப்பதற்காக 1963ஆம் ஆண்டு கட்டப்பட்டது.

மீனவர்களின் போக்குவரத்திற்கு பெரிதும் உதவிய இந்த குறுகிய பாலம் 1976ஆம் ஆண்டு வீசிய புயலின்போது கடல் அலைகள் தாக்கி உடைந்து விழுந்தது. குத்துயிராக காட்சி தரும் அடையாறு முகத்துவார பாலம், இன்றைக்கும் இயற்கை எழில் சூழ்ந்த ஒரு அமைதியான இடமாகும்.

எலியிட்ஸ் கடற்கரையை ஒட்டியுள்ள தியோசாஃபிகல் சொசைட்டியில் வாழ்ந்துவந்த தத்துவ மேதை ஜே.கிருஷ்ணமூர்த்தி, அதன் வாழ்ந்த காலத்தில் அமைதியான இந்தக் கடற்கரையில் நடக்கத் தொடங்கி, உடைந்து நிற்கும் இந்த பாலத்தின் முனை வரை நடந்து சென்று திரும்புவார்.

அவ்வளவு அமைதியாக இந்தப் பாலம், இப்போது சமூக விரோத செயல்களின் கூடாரமாக விளங்குகிறது. இதனால் ரம்மியம் கலந்திருக்கும் இப்பாலம் அமைந்துள்ள சூழலை ரசிக்க முடியவில்லை பலரும் வருந்துகின்றனர்.

பாலத்தை சரி செய்து அதற்கு செல்லும் சாலையையும் சீராக்கினால் பட்டிணப்பாக்கம்- பெசன்ட்நகர் மார்க்கம் செல்லும் பள்ளி சிறுவர்களுக்கும், போக்குவரத்து வசதிக்கும் பேருதவியாக இருக்கும் என்பது இப்பகுதிவாசிகளின் எதிர்பார்ப்பாகும்.

பட்டிணப்பாக்கத்தையும், பெசன்ட்நகரையும் இணைக்கும் அடையாறு பாலம் புதுப்பிக்கப்பட்டால் பல்வேறு வகையில் தங்களுக்கு பயன் அளிக்கும் என்று இப்பகுதிகளில் வாழும் மீனவர்கள் கூறுகின்றனர்.

அடையாறு பகுதியையும், கிரீன்வேஸ் சாலை சந்திப்பையும் இணைக்க திரு.வி.க பாலம் இருந்தாலும் வாகன வசதி இல்லாத மீனவ மக்களுக்கு அடையாறு முகத்துவார பாலம் மிகப் பயனுள்ளதாக இருக்கும்.

250 பாலங்களை கொண்ட சிங்கார சென்னையில் இந்த அடையாறு முகத்துவார பாலம் மட்டும் 34 ஆண்டுகளாக உடைபட்ட நிலையிலேயே உள்ளது. தடைப்பட்டிருக்கும் போக்குவரத்திற்கு விடிவு காலம் பிறக்குமா? என்பதே மீனவர்களின் கேள்வி.

அடையாறு முகத்துவார பாலம் மட்டும் கிடையாது தமிழகத்தில் உள்ள பெரும்பாலான பாலங்களுக்கும் இந்நிலைதான்.

நெல்லை மாவட்டம் ஸ்ரீவைகுண்டம் பாலம் ஒன்றரை கிலோ மீட்டர் நீளம் கொண்டது. இந்த பாலத்தை கடந்துதான் ஒருநாளைக்கு நூற்றுக்கணக்கான வாகனங்கள் சென்று வருகின்றன. ஒருவழிபாதையாக அமைக்கப்பட்டுள்ள அந்த பாலத்தில் பேருந்து ஒன்று வரும் போது மறுமுனையில் வரும் பேருந்து நின்று கொண்டிருக்கதான் வேண்டும். பாலத்தை கடந்து பேருந்து சென்ற பிறகுதான் மற்ற வாகனங்கள் செல்ல முடியும். அப்படிப்பட பாலத்தின் தற்போதைய நிலை மிகவும் மோசமாக உள்ளது. வெடிப்புகள் நிறைந்ததாகவும், மேடு பள்ளங்களுடன் காணப்படுகிறது. தூண்களில் உள்ள இரும்பு கம்பிகள் வெளியே தெரியும் அளவுக்கு பாலம் இருக்கிறது. பல ஆண்டுகளுக்கு முன்பு கட்டப்பட்ட அந்த பாலம் தற்போது பராமரிப்பின்றி இருக்கிறது. எப்போது இடிந்து விழும் நிலையில் அந்த பாலம் உள்ளது.

மக்கள் பயன்பாட்டிற்கு அவசியமான இப்படிப்பட்ட பாலங்களை உடனே பழுதுபார்த்து பயன்பாட்டிற்கு கொண்டுவருமா அரசு?

காவலன்!

ஒரு ஊரில் ஒரு ராஜா இருந்தார். அவருக்கு நாட்டில் நல்ல பெயர். இவரைப் போல வல்லவர் உண்டா என்று அனைவருமே புகழாரம் சூட்டினர். ராஜாவும், நாட்டு மக்களை அவ்வளவு அருமையாக கவனித்துக் கொண்டார். நாட்டு மக்களுக்கு எந்தப் பாதிப்பும் வந்து விடாமல் காக்க பக்காவான காவல் ஏற்பாடுளையும் செய்து வைத்திருந்தார்.

காவலர்களும் சும்மா இல்லை. சிறப்பான பாதுகாப்பை நாட்டு மக்களுக்கும், ராஜாவுக்கும் கொடுத்தனர். ஆனால் தங்கம் தரமானதாக இருந்தாலும், குறை இருக்கத்தானே செய்யும். அதேபோல சில காவலர்கள் சரிவர செயல்படாததால், அவர்களால் நாட்டு மக்களுக்கும், ராஜாவுக்கும் சிக்கல் வந்து விட்டது. வந்த சிக்கலை எப்படியோ சமாளித்தார் ராஜா. அதன் பிறகு காவலில் படு கவனமாக இருந்தார்.

இந்தக் கதை எதற்கு என்றால், இப்படித்தான் நம்மில் பலர் 'இதை' நம்பலாம் என்று நம்பி ஏமாந்து போவார்கள், சிக்கலில் மாட்டிக் கொள்கிறார்கள். இப்போது நாம் சொல்லப் போவது ஆணுறைகளைப் பற்றி.

குழந்தைப் பிறப்பைத் தடுக்க மட்டுமல்லாமல் இப்போது எச்ஐவி, பாலியல் நோய்கள் போன்றவற்றையும் தடுக்க முக்கிய சாதனமாக விளங்குவது ஆணுறைகள். பெரும்பாலான ஆணுறைகள் சிறப்பாகவே உள்ளன. ஆனால் ஆணுறைகளை முழுமையான பாதுகாப்பாக கருத முடியுமா என்றால் இல்லை என்ற பதில்தான் வருகிறது.

அதாவது 85 சதவீத அளவுக்குத்தான் ஆணுறைகளை நம்பலாம். ஆணுறைகளைப் பயன்படுத்தினால் கர்ப்பமாவதை தடுக்க முடியும் என்று உறுதியாக கூற முடியாது என்பது நிபுணர்களின் வாதம்..

இதற்கு என்ன செய்யலாம்...?

பாதுகாப்பான உடலுறவுக்குத் தயாராகி விட்ட பின்னர் ஆணுறைகளைப் பயன்படுத்தி வழக்கம் போல உறவில் ஈடுபடுங்கள். உறவு முடிந்ததும், கர்ப்பத் தடை மாத்திரைகளை தவறாமல் எடுத்துக் கொள்ளுங்கள். இவற்றைப் பயன்படுத்துவது குறித்து முன்பே டாக்டர்களிடம் உரிய ஆலோசனை எடுத்துக் கொள்ள வேண்டியது அவசியமாகும். அதேசமயம், இதை ஒரு பழக்கமாக மாற்றிக் கொள்வதையும் தவிர்ப்பது மிக மிக அவசியம்.

ஆணுறைகள் லேட்டக்ஸ் அல்லது பாலியுரிதீன் என்ற வேதிப் பொருளால்தான் தயாரிக்கப்படுகிறது. இதன் மூலம் எர்பஸ், சிலமிடியா அல்லது டிரைகோமோனியாஸிஸ் போன்ற சில பாலியல் நோய்களைத் தடுக்க முடியும். அதேசமயம், தோல் மூலம் பரவும் நோய்கள், குறிப்பாக ஆண் மற்றும் பெண் உறுப்புகள் மூலம் பரவும் நோய்களை அது தடுக்க முடியாது.

அதேபோல விலங்குகளின் திசுக்களிலிருந்து தயாரிக்கப்பட்ட ஆணுறைகளையும் பயன்படுத்துவதைத் தவிர்ப்பது அவசியம்.

எச்ஐவியை முழுமையாக ஆணுறைகள் தடுக்கும் என்று கூற முடியாது. ஆண் அல்லது பெண் இருவரில் யாராவது ஒருவருக்கு எச்ஐவி பாதிப்பு இருந்தால், ஆணுறைகளைப் பயன்படுத்தினால் கூட அது பரவும் வாய்ப்பு உள்ளது.

பாதுகாப்பான, முறையான உடலுறவே நோய்களைத் தேடிப் போகாமல் தடுத்துக் கொள்ள ஒரே வழி. சில நேரம் ஆணுறைகள் பாதியிலேயே கிழிய வாய்ப்புண்டு. இதனால் விந்தணுக்குள் பெண்ணுறுப்பை ஊடுறுவிச் செல்லும் வாய்ப்புகள் உண்டு. சிலர் சரிவர ஆணுறையை கையாள தெரியாமல் பயன்படுத்தலாம்.

எனவே உடலுறவுக்குத் திட்டமிடும்போது பாதுகாப்பான முறையில் அதை அமைத்துக் கொள்வதே நல்லது. இல்லாவிட்டால் காவல் காப்பதில் கோட்டை விட்டு ராஜாவைக் கவிழ்த்திய காவலர் கதைதான்.

(நாளை, டிசம்பர் 1ம் தேதி உலக எய்ட்ஸ் தினமாக அனுசரிக்கப்படுகிறது)