வட மாநிலங்கள் முடங்கின.

புதுடெல்லி : வரலாறு காணாத பனி மூட்டத்தால் வட மாநிலங்கள் நேற்று முடங்கின. கடுங்குளிரில் மக்கள் நடுங்கினர். உத்தர பிரதேசத்தில் 3 ரயில் விபத்துகள் ஏற்பட்டு 10 பேர் பலியாகினர். பனி காரணமாக வடமாநில மின் தொகுப்பில் ஏற்பட்ட கோளாறால் டெல்லி, பஞ்சாப், அரியானா மாநிலங்களும் சண்டிகார் மற்றும் காஷ்மீர் மாநிலத்தின் ஒரு பகுதியும் இருளில் மூழ்கின. விமானம், ரயில் மற்றும் சாலை போக்குவரத்துகள் முடங்கின.
வட மாநிலங்களில் சில வாரங்களாக பனி மூட்டம், கடுங்குளிர் வாட்டுகிறது. நேற்று உச்ச கட்டமாக இயல்பு வாழ்க்கை முடங்கியது. காலை 10 மணி ஆகியும் மக்கள் வீட்டை விட்டு வெளியே வர முடியாமல் நடுங்கினர். உத்தர பிரதேசத்தில் மிக அதிக பாதிப்பு தெரிகிறது. அங்கு இரண்டு நாளில் 25 பேருக்கு மேல் குளிரால் இறந்துள்ளனர்.
டெல்லி, பஞ்சாப், அரியானா மாநிலங்களிலும் பனி மூட்டம் கடுமையாக இருந்தது. ரயில், விமான, சாலை போக்குவரத்து கடுமையாக பாதிக்கப்பட்டது. ஏராளமான விமானங்கள் ரத்து செய்யப்பட்டன.

விடிந்து பல மணி நேரம் தாண்டிய பிறகும் சாலையில் எதுவும் கண்ணுக்கு தெரியவில்லை. அதனால் பல வாகனங்கள் விபத்தில் சிக்கின. அமிர்தரசில் அதிகபட்சமாக மைனஸ் 1.2 டிகிரி செல்ஷியஸ் குளிர் இருந்தது. ரயில்கள், விமானங்கள் ரத்தானதால் பயணிகள் ரயில் நிலையங்களிலும் விமான நிலையங்களிலும் குளிரில் நடுங்கியபடி தங்கியிருந்தனர்.
உ.பி.யில் கடுமையான பனி மூட்டம் நிலவியதால் 50 மீட்டருக்குள் இருக்கும் பொருட்களைக்கூட பார்க்க முடியவில்லை. தண்டவாளத்தில் ரயில் நிறப்தும் தெரியவில்லை. இதனால் 3 இடங்களில் ரயில் விபத்துகள் நடந்தன. டெல்லியில் இருந்து அலகாபாத் செல்லும் பிரயாக்ராஜ் எக்ஸ்பிரஸ் 8 மணிக்கு கான்பூர் மாவட்டம் பாங்கி ரயில் நிலையத்தில் நின்றிருந்தது. அப்போது, பிவானியில் இருந்து கோரக்பூர் செல்லும் கோரக்தம் எக்ஸ்பிரஸ் அதன் பின்புறத்தில் பயங்கரமாக மோதியது. இந்த விபத்தில் 10 பயணிகள் பலியானார்கள். 40 பேர் படுகாயம் அடைந்தனர். 10 பேர் நிலைமை கவலைக்கிடமாக இருக்கிறது. கோரக்தம் ரயிலில் பயணம் செய்த பா.ஜ. தலைவர் முரளி மனோகர் ஜோஷி, காங்கிரஸ் எம்.பி. கமல் கிஷோர் ஆகியோர் காயமின்றி தப்பினர்.

இதே மாநிலத்தில் சராய் பாபத் நிலையத்தில் மகத் எக்ஸ்பிரஸ் 9 மணியளவில் நின்றிருந்தது. டெல்லியில் இருந்து சித்தாமரி செல்லும் லிச்சாவி எக்ஸ்பிரஸ் வேகமாக வந்து பின்புறம் மோதியது. மகத் எக்ஸ்பிரசின் கடைசி பெட்டிகள் நொறுங்கின. லிச்சாவி எக்ஸ்பிரஸ் டிரைவர் உட்பட 10 பேர் காயம் அடைந்தனர்.

அலகாபாத் அருகே ஆளில்லாத ரயில்வே கிராசிங்கை கடந்த டிராக்டர் டிராலி மீது சராயு எக்ஸ்பிரஸ் மோதியது. டிராலி தூக்கி வீசப்பட்டது. அதிர்ஷ்டவசமாக உயிர்ச் சேதம் இல்லை. ரயில் விபத்துகளில் பலியானோர் குடும்பத்துக்கு தலா ரூ.5 லட்சம் வழங்க ரயில்வே துறை உத்தரவிட்டுள்ளது.

வட மாநில மின்தொகுப்பில் மின்சாரம் கடத்தும் சாதனங்களில் பனி மூட்டத் தால் கோளாறு ஏற்பட்டு மின்சாரம் துண்டிக்கப்பட் டது. இதனால் அதிகாலை முதல் மின்சாரம் தடைபட்டு 5 மாநிலங்கள் இருளில் மூழ்கின. மின்சார மற்றும் எக்ஸ்பிரஸ் ரயில்கள் நடுவழியில் நின்றன. புறநகர் மின்ரயில் சேவையும் கடுமையாக பாதிக்கப்பட்டதால் மக்கள் தவித்தனர்.

பெண்களை ஏமாற்றிய ‘கல்யாண மன்னன்’ கைது.

தேனி : சிவகங்கை மாவட்டம், காரைக்குடி முத்துபட்டினத்தைச்சேர்ந்த வெங்கடசலத்தின் மகன் பொன்குமரன்(42). இவருக்கு தமிழ், ஆங்கிலம், இந்தி, மலையாளம், கன்னடம், மலாய் உள்ளிட்ட பல மொழிகள் பேசத்தெரியும். இவர் கடந்த 92ம் ஆண்டில் தெய்வானை என்பவரை திருமணம் செய்தார். இவர்களுக்கு 15 வயதில் ஒரு மகள் உள்ளார்.
கடந்த சில ஆண்டுகளுக்கு முன்பு மனைவியை பிரிந்த பொன்குமரன் சென்னை சென்றார். அங்கு ஒரு சினிமா ஸ்டூடியோவில் கம்ப்யூட்டர் பிரிவிலும், பின்னர், நட்சத்திர ஓட்டலிலும் வேலை செய்தார். அப்போது ஆடம்பரத்தில் நாட்டம் கொண்டார். இதற்காக தனது பெயரில் ஒரு இணையதளத்தை துவக்கினார்.

அமெரிக்காவில் பெரிய கம்பெனியில் மாதம் ரூ.10 ஆயிரம் டாலர் சம்பளத்தில் வேலை பார்ப்பதாகவும், இந்திய வம்சாவளியை சேர்ந்த தனக்கு, எந்த மொழியை சேர்ந்த பெண் கிடைத்தாலும் திருமணம் செய்து கொள்ள தயாராக உள்ளதாகவும் குறிப்பிட்டார். தனக்கு இந்தியாவில் உறவினர் யாரும் இல்லை என்றும், சென்னை, புனே, மும்பை உள்ளிட்ட இடங்களில் ஏராளமான சொத்துகள் உள்ளதாகவும் கூறியிருந்தார்.

இதை நம்பி போடியைச் சேர்ந்த நளினி(35) என்பவர், இவரிடம் தொடர்பு கொண்டார். சரளமாக ஆங்கிலத்திலும், இந்தியிலும் இவர் பேசியதை பார்த்து நளினி ஏமாந்தார். பெற்றோர் ஒப்புதலுடன் பொன்குமரனை கடந்த சில மாதங்களுக்கு முன் திருமணம் செய்தார். பின்னர், போடியில் எஸ்டேட் தொழில் துவங்கி, இங்கேயே தங்குவதாக கூறி நளினியின் பெற்றோரிடம் ரூ.47 லட்சம் வாங்கிய பொன்குமரன், தொழிலுக்கு மேலும் பணம் தேவைப்படுவதாக கூறி நளினியிடம் இருந்து 150 பவுன் நகைகளை வாங்கிக் கொண்டு சென்றார். இதன்பின், அவரை பல இடங்களில் தேடியும் கிடைக்கவில்லை. இதுகுறித்து தேனி எஸ்பி பாலகிருஷ்ணனிடம் நளினி புகார் அளித்தார். டிஎஸ்பி உமா தலைமையில் போலீஸ் தனிப்படை அமைத்து பொன்குமரனை தேடி வந்தனர். இப்படையினர், நேற்றுமுன்தினம் தேனியில் ஒரு லாட்ஜில் தங்கியிருந்த பொன்குமரனை சுற்றி வளைத்து கைது செய்தனர்.

அவரிடம் நடத்திய விசாரணையில், புனேயில் 2 பெண்களை ஏமாற்றி பல லட்சம் மோசடி செய்ததும் தெரியவந்தது. இன்னும் பல பெண்களை திருமணம் செய்து லட்சக்கணக்கில் ஏமாற்றியிருக்கலாம் என போலீசார் சந்தேகிக்கின்றனர்.

கண்களை காக்கும் காய்கறிகள்.

பொதுவாக உடல் ஆரோக்கியதிற்கு காய்கறிகள் மிகவும் அவசியம். அதனால் தான் மருத்துவர்கள் உணவில் அதிக அளவில் காய்கறிகளை சேர்த்துக் கொள்ள வேண்டும் என அறிவுறுத்துகின்றனர். நம் அன்றாடம் உண்ணும் உணவிலேயே கண்களைப் பாதுகாக்கும் விஷயங்கள் அடங்கி உள்ளன.

பச்சைக் காய்கறிகளில் வைட்டமின் ஏ மற்றும் வைட்டமின் சியும், இரும்பு மற்றும் கால்சியம் சத்துகளின் முதன்மை ஆதாரங்களும் அடங்கி உள்ளன. இவை கண்களுக்கு மிகவும் நல்லது. தினமும் எதாவது ஒரு கீரை வகை சேர்ப்பது உடல் நலத்துக்கு ஏற்றது.

குறைந்த பட்சம் வராத்திற்கு இரண்டு தடையாவது கிரை சேர்க்க வேண்டும் . அகத்திக் கீரை, பசலைக் கீரை, முருங்கை, பொன்னாங்கன்னி, முளக்கீரை, அரக்கீரை, வெந்தயக் கீரை ஆகிய கீரைகளில் இரும்பு, போலிக் ஆசிட் மற்றும் வைட்டமின் பி௧2 ஆகிய சத்துக்கள் அடங்கியிருப்பதால் இவற்றை அதிகம் சேர்த்துக் கொள்வது நல்லது.

பச்சைக் காய்கறிகளுடன் சாலட் மற்றும் எலுமிச்சை நம் பார்வையை பெரிதும் கூர்மையாக்குகிறது.வைட்டமின் ஏயில் கண்ணையும், மூளையையும் இணைக்கும் முக்கிய சத்து அடங்கியுள்ளது. கண் விழித்திரையிலுள்ள ரோடோஸ்பின் என்ற புரதத்தில் வைட்டமின் ஏ உள்ளது. பார்வையில் இது முக்கிய பங்கு வகிக்கிறது.

வைட்டமின் ஏ சத்து பற்றாக்குறையால் முதலில் தோன்றும் அறிகுறி மாலைக்கண் நோய். காரட்டில் அதிகமான வைட்டமின் ஏ உள்ளது. வைட்டமின் ஏ வாக நம் உடலில் மாற்றம் அடையும் பீட்டா கரோடின் மற்றும் அதிநிற பழங்களிலும், பச்சைக் காய்கறிகளிலும் வைட்டமின் ஏ உள்ளது.

தக்காளி, பசலை, லிவர், முட்டை, நிறமயமான காய்கறிகள், கேரட், பப்பாளி மற்றும் பச்சை இலைகளில் உள்ளது.உடலில் அதிகமாக சுரக்கும் குளூக்கோஸினால் கண்லென்ஸ் சேதமடைவதிலிருந்து புரத அமிலங்கள் நம்மை காக்கின்றன.
இறைச்சி, மீன் மற்றும் பாலில் நமக்குத் தேவையான 8 முக்கிய அமினோ அமிலங்கள் உள்ளன. அரிசி, பட்டாணி, பீன்ஸ், அவரை, மொச்சை, துவரை, உளுந்து பயறு போன்றவற்றில் இறைச்சியில் உள்ள அளவுக்கு அமினோ அமிலங்கள் உள்ளன.

பொங்கலை முன்னிட்டு இலவச விநியோகம் 3.28 கோடி பேருக்கு வேட்டி, சேலை

சென்னை: பொங்கலை முன்னிட்டு 3.28 கோடி பேருக்கு இலவச வேட்டி சேலை வழங்கும் திட்டத்தை முதல்வர் கருணாநிதி நேற்று சென்னையில் தொடங்கி வைத்தார். தமிழ்ப் புத்தாண்டு மற்றும் பொங்கலை முன்னிட்டு தமிழக அரசு சார்பில் ரூ.256 கோடியில் 3 கோடியே 28 லட்சம் பேருக்கு இலவச வேட்டி, சேலைகள் வழங்கப்படுகின்றன. இந்த திட்டத்தின் தொடக்க விழா சென்னை சிந்தாதிரிப் பேட்டையில் நேற்று காலை நடந்தது. விழாவுக்கு வருவாய்த் துறை அமைச்சர் ஐ.பெரியசாமி தலைமை தாங்கினார். மத்திய ஜவுளித்துறை அமைச்சர் தயாநிதி மாறன் முன்னிலை வகித்தார். இலவச வேட்டி சேலைகளை வழங்கி திட்டத்தை முதல்வர் கருணாநிதி தொடங்கி வைத்தார்.

விழாவில் துணை முதல்வர் மு.க.ஸ்டாலின், அமைச்சர்கள் ஆற்காடு வீராசாமி, துரைமுருகன், பரிதிஇளம்வழுதி, மத்திய அமைச்சர்கள் ஜெகத்ரட்சகன், பழனிமாணிக்கம் உட்பட பலர் கலந்து கொண்டனர். வருவாய் துறை செயலாளர் தனவேல் வரவேற்றார். தலைமைச் செயலாளர் ஸ்ரீபதி, மேயர் மா.சுப்பிரமணியன், வருவாய் நிர்வாக ஆணையர் சுந்தரதேவன் ஆகியோர் பேசினர். கலெக்டர் ஷோபனா நன்றி கூறினார்.

தமிழகத்தின் பல மாவட்டங்களில் நேற்று மாலை நடந்த விழாக்களில் இலவச வேட்டி சேலைகளை அமைச்சர்கள் வழங்கினர். இன்று முதல் 10ம் தேதி வரையில் ரேஷன் கடைகள் மூலம் இலவச வேட்டி சேலைகள் வழங்கப்படுகின்றன. 10ம் தேதிக்குள் வாங்க முடியாதவர்கள், பின்னர் தாலுகா அலுவலகம் சென்று பெற்றுக் கொள்ளலாம். ரேஷன் கடைகளில் காலையில் 100 பேருக்கும், மாலையில் 100 பேருக்கும் வேட்டி சேலை வழங்கப்படும். இந்த பணிகள் தாசில்தார் மேற்பார்வையில் நடக்கும்.இவற்றை கண்காணிக்கும் பணியில் துணை கலெக்டர்கள் ஈடுபடுவார்கள். இலவச வேட்டி சேலை பெற தகுதியான, ஏழைகள் பட்டியலை நியாய விலைக் கடைகளிலும் கிராம நிர்வாக அலுவலர் அலுவலகங்களிலும் முன்னதாக வெளியிடவும், பட்டியலை பலகையில் ஒட்டி வைக்கவும் ஏற்பாடு செய்யப்பட்டுள்ளது

புதுகை அருகே ஜல்லிக்கட்டில் 75 பேர் காயம்

பொன்னமராவதி: புதுக்கோட்டை மாவட்டம் வேந்தன்பட்டியில் நல்லாண்டி ஐயனார் கோயில் திருவிழா நேற்று தொடங்கியது. இதையொட்டி, மாவட்ட நிர்வாகத்தின் அனுமதியுடன் ஜல்லிக்கட்டு நடந்தது. புதுக்கோட்டை, சிவகங்கை, திருச்சி, மதுரை, திண்டுக்கல், தஞ்சை, ராமநாதபுரம் உள்ளிட்ட மாவட்டங்களில் இருந்து 500க்கும் மேற்பட்ட காளைகள் அழைத்து வரப்பட்டிருந்தன.

கால்நடை டாக்டர் முத்துராமலிங்கம் தலைமையிலான குழுவினர், காளைகளுக்கு மருத்துவ பரிசோதனை செய்தனர். அதேபோல், மாடுபிடி வீரர்களுக்கும் மது அருந்தியிருந்தார்களா? என்று சோதனை செய்யப்பட்டது.

பின்னர், 400க்கும் மேற்பட்ட வீரர்கள், சீருடையுடன் களத்தில் இறங்கினர். வீர விளையாட்டு பேரவை மாநில தலைவர் ராஜசேகரன், ஜல்லிக்கட்டை தொடங்கி வைத்தார். சீறிப்பாய்ந்து வந்த காளைகளை பிடிக்க வீரர்கள் போட்டி போட்டனர். ஒரு காளை முட்டியதில், பாதுகாப்புக்கு வந்திருந்த ஏட்டு கொத்தாள முத்து காயமடைந்தார். மேலும், மாடுபிடி வீரர்கள் பாலு, மணி, ராஜேந்திரன், ஜெகன், சின்னண்ணன், முத்துராமலிங்கம் உட்பட 74 பேர் காயமடைந்தனர். இவர்களுக்கு டாக்டர்கள் சிகிச்சை அளித்தனர். படுகாயமடைந்தவர்கள் பொன்னமராவதி மற்றும் புதுக்கோட்டை அரசு மருத்துவமனைகளுக்கு அனுப்பி வைக்கப்பட்டனர். காளைகளை அடக்கியவர்களுக்கு ரூ.1,000, ரூ.2,000, ரூ.5,000 மற்றும் சைக்கிள், மிக்ஸி, கிரைண்டர் மற்றும் பிடிபடாத காளைகளுக்கு என மொத்தம் ரூ.10 லட்சம் மதிப்பில் பரிசுகள் வழங்கப்பட்டன. புதுக்கோட்டை ஆர்.டி.ஓ. பாஸ்கரன் தலைமையில் அதிகாரிகள் ஜல்லிக்கட்டை கண்காணித்தனர்.

பாரில் போலீசுக்கு கும்மாங்குத்து கம்பி எண்ணாமல் தப்பினார் டெய்லர்

கிங்ஸ்டன்: பாரில் தகராறு செய்த வெஸ்ட்இண்டீஸ் கிரிக்கெட் வீரர் டெய்லர், புத்தாண்டில் கம்பி எண்ணாமல் தப்பினர்.

வெஸ்ட்இண்டீஸ் கிரிக்கெட் அணியின் நட்சத்திர வீரர் ஜெரூம் டெய்லர். இவர் ஜமைக்கா நாட்டின் செயின்ட்எலிசபத் நகரில் உள்ள ஒரு மதுபாருக்கு நேற்று முன்தினம் இரவு சென்றார். பார் மூடும் நேரத்திற்கு பிறகும் மது கேட்டுள்ளார். அதற்கு ஊழியர்கள் மறுத்துவிட்டனர். போதையில் இருந்த டெய்லர், ஊழியர்களிடம் தகராறு செய்தார். பிரச்னை பெரிதாகவே போலீசுக்கு தகவல் கொடுக்கப்பட்டது.

இதுகுறித்து, போலீசார் விசாரனை செய்தனர். அப்போது போலீஸ் ஒருவரை டெய்லர் கடுமையாக தாக்கினார். இதையடுத்து, டெய்லர் கைது செய்யப்பட்டார். அவர் மீது போலீசாரை பணி செய்ய விடாமல் தடுத்தல், அரசு ஊழியரை தாக்கியது ஆகிய பிரிவுகளில் வழக்கு பதிவு செய்யப்பட்டது. கைது செய்யப்பட்ட டெய்லரை 12ம் தேதி நீதிமன்றத்தில் ஆஜராகவேண்டும் என்ற நிபந்தனையின் பேரில் போலீசார் விடுதலை செய்தனர்.

பெண் ஆணிடம் எதிர்ப்பார்ப்பது.

ஒரு ஆணின் கவர்ச்சியாக பெண் நினைப்பது எது என கேட்டால், அந்த கேள்விக்கான பதில் பெண்ணுக்கு பெண் வேறு படும். சராசரியாக பெண்கள் ஆண்களின் கவர்ச்சியாக எதை நினைக்கிறார்கள், அவர்களை கவர்வது எது, அவர்கள் எதிர்பார்ப்புகள் என்ன என ஆராய்ந்து, எனக்கு தெரிந்த பல பெண்களின் கருத்துகளிலிருந்து, ஒரு ஆணின் கவர்ச்சி என்ன என்பதை இங்கு சொல்கிறேன்..

ஒரு பெண்ணின் கவர்ச்சி என்ன என்பதற்கு பல ஆண்களின் பதில் ஒரே வரியில், ஒரே மாதிரியான பதிலாகயிருந்தாலும், ஆண்களின் கவர்ச்சி என்ன என்பதை ஒரே வரியில் பதிலளிக்க இயலாது, ஏனென்றால் ஆண்களின் கவர்ச்சியில் பல வகைகள் உள்ளன.

நிறம்:

ஒரு ஆண் சிவந்த மேனியாக இருக்க வேண்டும் என fair complexion உள்ள பெண்கள் கூட எதிர் பார்ப்பதில்லை. ஒரு ஆணின் வசீகரம் அவனின் நிறத்தில் அல்ல என்பதே பெண்களின் கருத்து.

முக தோற்றம்:

ஆணின் நிறத்திற்கு முக்கியத்துவம் கொடுக்காத பெண்கள் கூட, அவர்கள் மீசை க்கு முக்கியத்துவம் கொடுக்கிறார்கள். மீசை ஒரு ஆணுக்கு அழகு, கம்பீரம் என்பது அவர்கள் கருத்து. மீசையை பிடிக்கும் பல பெண்களுக்கு ஏனோ தாடி பிடிப்பதில்லை. காரணம் நம்மூர் ஆண்களுக்கு தாடி வளர்த்தால் அதை ஒழுங்காக பராமரிக்கத் தெரிவதில்லை என்பதுதான். சரியாக டிரிம் பண்ணாமல் காடு மாதிரி வளர்ந்த தாடி ஒரு ஆணை சோகமாகவும், நோய் வாய் பட்டது போலவும் தோற்றமளிக்க செய்துவிடும்.

உடை அலங்காரம்:

பொதுவாக பெண்கள் தங்கள் உடை அலங்காரத்திற்கு அதிக அக்கறை எடுத்துக் கொள்வார்கள், அதனால் நல்ல ட்ரெஸ் ஸென்ஸ் ஆணிடமும் எதிர்பார்க்கிறார்கள். பேண்டின் நிறத்திற்கு கொஞ்சம் கூட சம்பந்தமே இல்லாத கலரில் ஷர்ட் அணிவது, சரியான அளவில் ஷர்ட் போடாமல், தொழ தொழ என நீளமான ஷர்ட் அணிவது, போன்றவை பெண்களுக்கு பிடிப்பதில்லை. இன்றைய ஆண்களின் கவர்ச்சி உடையாக அதிக பெண்கள் கருதுவது ஜீன்ஸ்- டி ஷர்ட். இடத்திற்கு தகுந்தார் போல் உடை அணிய வேண்டும். சுத்தமான, நல்ல கலர் சென்ஸுடன் உடை அணிந்தால் பெண்களின் மனதில் சீக்கிரமாக இடம் பிடித்து விடலாம்.

பேச்சு திறன்:

முதன் முறையாக ஒரு பெண்ணிடம் பேசும்போது, லொட லொட வென சொந்த கதை, சோக கதை எல்லாம் பேசக்கூடாது. அதே சமயம் அந்த பெண்ணிடமும் அவளை பற்றின சொந்த விஷயங்களை நோண்டி நோண்டி கேட்க கூடாது. அவளுக்கும் பேச சந்தர்ப்பம் கொடுத்து, அவள் பேசும் போது கூர்ந்து கவனிக்க வேண்டும் (அவள் முகத்தை மட்டும்!). முதல் நாளிலேயே பெரும்பான்மையான பெண்கள் நன்றாக பேசி பழகமாட்டாகள், அதனால் அவர்கள் பேசும் ஒரிரு வரிகளிலிருந்தே உங்கள் உரையாடலை வளர்த்துக் கொள்வது உங்கள் சாமர்த்தியம்.